គុណ​សម្បត្តិ​៩​ យ៉ាង​នាំ​ឱ្យ​អ្នក​ឈាន​ឆ្ពោះ​​ក្លាយ​ទៅ​ជា​មនុស្ស​ពូកែ​!

មនុស្ស​គ្រប់​រូប​សុទ្ធតែ​ចង់​ក្លាយ​ជា​មនុស្ស​ពូកែ​ ចង់​ឱ្យ​អ្នក​ដទៃ​លើក​សរសើរ​ និង​ ចង់​បាន​អ្នក​ទៅ​រួម​ការងារ​ជាមួយ​នៅ​ក្នុង​នក្រុមហ៊ុន​ ​ អ្នក​ច្បាស់​ជា​មិន​ចង់​ឱ្យ​អ្នក​ដទៃ​និយាយ​ពី​ក្រោយ​ខ្នង​អ្នក​ទេ​ថា​ «មិន​ព្រម​ចឈប់​តាំង​ពី​​យូរនៅ​ទៅ​ក៏​នាំ​តែ​ជា​បន្ទុក​ក្រុមហ៊ុន​»។ ប្រសិន​​បើ​អ្នក​ធ្លាប់​អាន​សៀវភៅ​ The World is Flat របស់​លោក​ Thomas L. Friedman ពិភព​ការងារ​របស់​មនុស្ស​អ្នក​ធ្វើ​ការ​នឹង​​មិន​អាច​ស្ថិតស្ថេរ​បាន​ទេ​ បើ​អ្នក​មិន​ចេះ​ផ្លាស់ប្ដូរ​ខ្លួន​ឯង​ មិន​ព្យាយាម​សាង​គុណ​តម្លៃ​ឱ្យ​ខ្លួនឯង​។ សំនួរ​សួរ​ថា​តើ​យើង​សាង​គុណ​តម្លៃ​ ឱ្យ​ខ្លួន​ឯង​តាម​របៀបណា​?​ ដើម្បី​វិវត្ត​ខ្លួន​ជា​មនុស្ស​ពូកែ​ មាន​តម្លៃ​សម្រាប់​ក្រុម​ហ៊ុន​ ថ្ងៃ​ចូរ​អ្នក​សាក​សង្កេត​ខ្លួន​ឯង​ថា​ តើ​អ្នក​មាន​គុណ​សម្បត្តិ​របស់​មនុស្ស​ពូកែ​ហើយ​ឬនៅ?​

១. ជា​មនុស្ស​​ស្វះស្វែង​​ចង់​ចេះ​ដឹង​ ធ្វើ​ខ្លួន​ជា​ចៃ​សៀវភៅ​

មនុស្ស​យើង​កើត​មក​ មាន​មូលដ្ឋាន​នៃ​ចំណេះដឹង​មិន​ស្មើ​គ្នា​នោះ​ទេ​ តែ​យើងអាច​បន្ថែម​ចំណេះដឹង​ឱ្យ​ខ្លួន​ឯង​បាន​ ដោយ​វិធី​ងាយ​បំផុត​នោះ​គឺ​ការ​អាន​សៀវភៅ​ ព្រោះ​ការ​អាន​សៀវភៅ​ ធ្វើ​ឱ្យយើង​ពូកែ​ឡើង​យ៉ាង​ពិត​ប្រាកដ​ ដូចជា​នៅ​ក្នុង​ជីវិត​ធ្វើ​ការងារ​ ក្រុមហ៊ុន​រំពឹង​ឱ្យ​អ្នក​មាន​ចំណេះ​ដឹង​សព្វ​គ្រប់​ ស្ទាត់​ជំនាញ​នៅ​ក្នុង​តួនាទី​ដែល​អ្នក​កំពុង​តែ​ទទួល​ខុស​ត្រូវ​ ហើយ​អ្វី​ទាំង​អស់​នេះ​កើត​ឡើង​បាន​ទាល់​តែ​អ្នក​សិក្សា​បន្ថែម​ ស្វះស្វែង​ ហ្វឹកហាត់​ជាប់​ជានិច្ច​ ដូច្នេះ​សាក​សួរ​ខ្លួន​ឯង​ទៅ​មើល​ថា​ ថ្ងៃ​នេះ​អ្នក​បាន​ប្រើ​ពេលវេលា​អាន​សៀវភៅ​ប៉ុន្មាន​ម៉ោង​ ក្នុង​មួយ​ខែ​បាន​អាន​សៀវភៅ​ប៉ុន្មាន​ក្បាល​? បើសិន​មាន​មនុស្ស​សួរ​អ្នក​ថា​ សៀវភៅ​ដែល​អ្នក​ស្រលាញ់​ ដែល​ជា​សៀវភៅ​ជំរុញ​ទឹក​ចិត្ត​អ្នក​គឺ​សៀវភៅ​មួយ​ណា​ អ្នក​អាច​ឆ្លើយ​តប​សំនួរ​នេះ​បាន​ឬ​អត់?​

២. នៅ​ក្បែរ​មនុស្ស​ពូកែ​!

ធ្លាប់​មាន​គេ​និយាយ​ថា​ «ជីវិត​អ្នក​នឹង​ទៅ​ជា​បែប​ណា​ អាស្រ័យ​លើ​សៀវភៅ​ដែល​អ្នក​អាន​ ផ្ទះ​ដែល​អ្នក​រស់​នៅ​ មិត្តភក្តិ​ដែល​អ្នក​សេពគប់​» ដូច្នោះ​ បើ​សិន​អ្នក​ចង់​ក្លាយ​ខ្លួន​ជា​មនុស្ស​ពូកែ​ អ្នក​គួរ​តែ​រក​អ្នក​ណា​ម្នាក់​ ដែល​ជា​ Role Model មិន​ចាំ​បាច់​តែ​មនុស្ស​ម្នាក់​នោះ​មាន​អាយុ​ច្រើន​ជាង​អ្នក​ មាន​បទ​ពិសោធ​ច្រើន​ជាង​អ្នក​ ឬ មនុស្ស​មាន​តំណែង​ខ្ពស់​ជាង​អ្នក​ (ជួន​កាល​មនុស្ស​ចាស់​ឱ្យ​ក្មេង​មក​បង្រៀន​លេង​ Facebook ឬ​លេង​ហ្គេម​ក៏​ថា​បាន​ដែរ​)​ អ្វី​ដែល​សំខាន់​ គឺអ្នក​ត្រូវ​តែ​បើក​ចិត្ត​រៀនសូត្រ​ពី​អ្នក​ដទៃ​ ព្យាយាម​នៅ​ក្បែរ​មនុស្ស​ពូកែ​ៗ​ សិក្សា​ រៀនសូត្រ​ពី​គេ​ បើសិន​ជា​មនុស្ស​នៅ​កន្លែង​ការងារ​ អ្នក​អាច​រៀន​សូត្រ​ការងារ​ពី​គេ​ដូច​ជា​ Work Shadow ក៏​បាន​ ព្រោះ​នឹង​ធ្វើ​ឱ្យ​អ្នក​កាន់​តែ​ពូកែ​ក្នុង​រយៈ​ពេល​ខ្លី​។

៣. កំណត់​គោលដៅ​ឱ្យ​ច្បាស់លាស់​

មនុស្ស​ពូកែ​ ឬ​ មនុស្ស​ជោគជ័យ​ គ្រប់​គ្នា​រមែង​មាន​ចំណុច​លេច​ធ្លោ​របស់​ខ្លួន​ ដែល​មនុស្ស​ទូទៅ​តែ​ងតែ​នឹក​ដល់​ដូច​ជា​ ពេល​និយាយ​ពី​ Elon Musk មនុស្ស​នឹង​នឹក​ដល់​ឡាន​ Tesla និយាយ​ពី​ Jack Ma មនុស្ស​​នឹង​នឹក​ដល់ Alibaba
​ការ​ពិត​មនុស្ស​យើង​មិនមែន​ល្អ​ឥត​ខ្ចោះ​នោះ​ទេ​ មាន​ចំណុច​ខ្សោយ និង​ ចំណុច​ខ្លាំង​ ជានិច្ច​ ព្យាយាម​ស្វែង​រក​ខ្លួន​ឯង​ឱ្យ​ឃើញថា​ អ្វី​ដែល​អ្នក​ចង់​បាន​ (You Want) ហើយ​អ្វី​ដែល​អ្នក​អាច​ធ្វើ​បាន​ (You Can) ព្រោះ​បើ​សិន​អ្នក​ស្វែង​រក​ឃើញ​ហើយ​នោះ​ ចូរ​កំណត់​គោល​ដៅ​តែ​ម្ដង​ទៅ​ថា​ ខ្ញុំ​ត្រូវ​តែ​ពូកែ​រឿង​នេះ​ ត្រូវ​តែ​​ជា​​ពូកែ​រឿង​នេះ​ជាង​គេ​បំផុត​ បន្ទាប់​មក​ចាប់​ផ្ដើម​ដើរ​តាម​គោលដៅ​របស់​ខ្លួន​ឱ្យ​បាន​​ម៉ត់ចត់​ ធានាថា​ភាព​ជោគជ័យ​ប្រាកដ​ជា​នៅ​មិន​ឆ្ងាយ​ពី​ដៃ​អ្នក​នោះ​ទេ​។

៤. ម៉ឺងម៉ាត់​ អត់ធ្មត់​ មិន​ចុះចាញ់​

ភាព​ពូកែ ​អាច​មិនមែន​ជា​ទេពកោសល្យ​ពី​កំណើត​ តែ​ជា​ការ​ស្វះស្វែង​រក​ ដូច​ក្នុង​សៀវភៅ​ Talent Code របស់​ Daniel Coyle ក៏​បាន​សរសេរ​ដែឬ​ថា​មនុស្ស​ដែល​ពូកែ​លំដាប់​ពិភពលោក​ រមែង​មក​ពី​ការ​ហ្វឹកហាត់​ម្ដង​ហើយ​ម្ដង​ទៀត​ ទោះ​ជា​នៅ​តាម​ផ្លូវ​នៃ​ការ​ហ្វឹកហាត់​នោះ​គេ​ជួប​នឹង​ឧបសគ្គ​លំបាក​បែបណា​ ធ្វើ​ឱ្យ​ចង់​បោះបង់​ចោល​ខ្លាំង​យ៉ាង​ណា​ តែ​បើ​សិន​យើង​ចង់​ជោគជ័យ​ យើង​ត្រូវ​តែ​ម៉ឺងម៉ាត់​ លះបង់​ ព្រោះ​ពិភពលោក​នេះ​ មិនមាន​អ្វី​បាន​មក​ដោយ​ទទេ​នោះ​ទេ​ ចង់​ជោគជ័យ​ ចង់​ពូកែ​ ត្រូវ​តែ​ហ៊ាន​លះបង់​។

៥. មាន​ទស្សនៈ​ និង​ គំនិត​ល្អៗ​

​​មូលដ្ឋាន​​​គំនិត​ដែល​ធ្វើ​ឱ្យ​អ្នក​ពូកែ​ឡើង​គឺ «ចាញ់​គេ​បាន​ តែ​ចាញ់​ហើយ​ត្រូវ​ក្រោក​ឡើង​វិញ​» មនុស្ស​យើង​មិន​ចាំ​ត្រូវ​តែ​ឈ្នះ​គ្រប់​រឿង​នោះ​ទេ​ ទោះ​ជា​ម្ចាស់​ខ្សែក្រវ៉ាត់​ប្រដាល់​ពិភពលោក​ ​មុន​នឹង​ក្លាយ​ជា​ម្ចាស់​ខ្សែក្រវ៉ាត់​គេ​ធ្លាប់​ចាញ់​ច្រើន​លើក​ច្រើន​សារ​ មនុស្ស​យើង​ចាញ់​បាន​ តែ​ចិត្ត​យើង​កុំ​ចុះ​ចាញ់​ ដួល​ហើយ​ត្រូវ​ក្រោក​ឈរ​ ដូច្នេះ​ចង់​ធ្វើ​ជា​មនុស្ស​ពូកែ​ មិនមែន​ទាល់​តែ​ល្អ​ឥត​ខ្ចោះ​នោះ​ទេ​ ខុស​ឆ្គង​បាន​ ភ្លាត់​ស្នៀត​បាន​ តែ​ត្រូវ​ចេះ​រៀន​សូត្រ​ពី​កំហុស​ឆ្គង​ ហើយ​ព្យាយាម​ ក្រោក​ឡើង​វិញ​ឱ្យ​បាន​លឿន​ ហើយ​ត្រលប់​​មក​​បន្ត​ធ្វើ​ការងារ​ដែល​យើង​បាន​កំណត់​​គោល​ដៅ​ទុក​។

៦. មាន​គុណ​ធម៌​ជា​ចំបង​​ក្នុង​ការ​ប្រើប្រាស់​ជីវិត​

មនុស្ស​យើង​ពូកែ​តែមួយ​មុខ​មិន​គ្រប់​គ្រាន់​នោះ​ទេ​ គួ​រ​មាន​​គោលការណ៍​​​ក្នុង​ការ​ប្រើប្រាស់​ជីវិត​ផង​ដែរ​ មនុស្ស​ពូកែ​តែ​មិនមាន​គោល​ការណ៍​ច្បាស់លាស់​ក្នុង​ការ​ប្រើប្រាស់​ជីវិត​ ​ចង់​សម្រេច​ជោគជ័យ​គឺ​ជារឿង​ពិបាក​។ អ្វី​ដែល​ធ្វើ​ឱ្យ​ភាព​ពូកែ​របស់​យើង​មើល​ឃើញ​ច្បាស់​ហើយ​ស្ថិតស្ថេរ​បាន​នោះ​ គឺ​គោលការណ៍​ក្នុង​ការ​ប្រើប្រាស់​ជីវិត​ ហើយ​គោល​ការណ៍​ចំបង​នោះ​គឺ​ គុណធម៌ ភាពល្អ​ស្អាត​ នៅ​ថ្ងៃ​ណាមួយ​បើសិន​អ្នក​ត្រូវ​សម្រេច​ចិត្ត​ធ្វើ​នូវ​រឿង​លំបាក​ណា​មួយ​ ចូរ​សួរ​ខ្លួន​ឯង​ថា​ អ្វី​គឺ​ជា​​គោលការណ៍​របស់​អ្នក​

៧. មាន​ជំនាញ​មូលដ្ឋាន​គ្រឹះ​

មាន​មនុស្ស​ធ្លាប់​ប្រាប់​ថា​ ជំនាញ​​ដែល​ធ្វើ​ឱ្យ​មនុស្ស​យើង​មាន​សមត្ថភាព​អាច​ទៅណា​មក​ណា​ក្នុងពិភពលោក​នេះបាន​មាន​៣​ គឺ​ ទី​១​ ជំនាញ​​ធ្វើ​ម្ហូប​ ទៅ​ដល់​ទីណា​ក៏​មិន​ខ្លាច​ដាច់​ពោះ​ស្លាប់​ ទី២ ជំនាញ​តន្ត្រី​ ដែល​ក្រៅ​ពី​ជួយ​បន្ធូរបន្ថយ​ភាព​តានតឹង​ហើយ​នោះ​ នៅ​ជួយ​ឱ្យ​រក​ប្រាក់​ចំណូល​បាន​ផង​ដែរ​ ទី៣​ ជំនាញ​ភាសាអង់គ្លេស​ ព្រោះ​មនុស្ស​ភាគ​ច្រើន​ក្នុង​ពិភពលោក​នេះ​ប្រើប្រាស់​ភាសាអង់គ្លេស​ក្នុង​ទំនាក់ទំនង​ តែ​នៅ​ក្នុង​យុគ​សម័យ​នេះ​ត្រូវ​បន្ថែម​ជំនាញ​ IT មួយ​មុខ​ទៀត​ ព្រោះ​រាល់​ថ្ងៃ​នេះ​ គ្រប់​យ៉ាង​ស្ទើរតែ​ជា​​ Digital អស់​ហើយ​ ដូច​ជា​ប្រើ​ Smartphone ក្នុង​ការ​​ស្វែង​រក​ព័ត៌មាន​ផ្សេង​ៗ​ ហើយ​បើ​អ្នក​ជា​អ្នក​ពូកែ​ភាសា​ ហើយ​នឹង​ IT ទៀត​នោះ​នឹង​ធ្វើ​ឱ្យ​អ្នក​មាន​ប្រៀប​នៅ​កន្លែង​ធ្វើ​ការ​។​

៨. កុំខ្លាច​ការងារ​ពិបាកៗ

«Ability without opportunity is nothing» ពាក្យ​នេះ​បាន​ន័យ​ថា​ «មាន​សមត្ថភាព​ តែ​​គ្មាន​​ឱកាស​ ស្មើ​នឹង​ទទេ​» សមត្ថភាព​​​ដែល​គ្មានឱកាស​គឺ​​ដូច​ជា​ភាព​ទទេ​ស្អាត​ដូច្នោះ​ដែរ​ មនុស្ស​យើង​មាន​ឱកាស​ច្រើន​យ៉ាង​ ដូច​ជា​ ​ឱកាស​ពី​ក្រុមហ៊ុន​ ដែល​មាន​ប្រព័ន្ធ​អភិវឌ្ឍ​មនុស្ស​ឱ្យ​ពូកែ​ ឱកាស​ដែល​បាន​ជួប​នឹង​ចៅហ្វាយ​នាយ​ល្អ​ អាច​បង្វឹក​និង​បង្កើត​កម្លាំង​ចិត្ត​ឱ្យ​យើង​បាន​ ពិសេស​ណែនាំ​បច្ចេកទេស​តិចនិក និង​គាំទ្រ​ ហើយ​ផ្ដល់​ឱកាស​ការងារ​ច្រើន​យ៉ាង​ ការងារ​មាន​ទំនួល​ខុស​ត្រូវ​កាន់​តែ​ខ្ពស់​ ការងារ​កាន់​តែ​ពិបាក​ ការងារ​បែបនេះ​នឹង​ធ្វើ​ឱ្យ​យើង​ធំធាត់​ឡើង​ ព្រោះ​មនុស្ស​យើង​កាន់​តែ​ចេះដឹង​តាម​រយៈ​បញ្ហា​និង​ចំណោទ​ដែល​យើង​បាន​ជួប​ក្នុង​ជីវិត​ប្រចាំ​ថ្ងៃ​ ហេតុនេះ​ ចូរ​កុំ​ខ្លាច​ការងារ​ពិបាក​ កុំ​ខ្លាច​ការងារដែល​មិន​ធ្លាប់​ធ្វើ​ កុំ​ខ្លាច​ការងារ​ដែល​គោលដៅ​ស្ទើ​តែមិន​អាច​ទៅ​រួច​ ព្រោះ​ការងារ​ទាំង​នេះ​នឹង​បង្វឹក​ឱ្យ​អ្នក​ពូកែ​ដូច​ជា​អ្នក​ពូកែៗ​ផ្សេង​ទៀត​ជំនាន់​ជាមួយ​អ្នក​។​

៩. បង្កើត​ទំនាក់ទំនង​​ដើម្បី​ផ្លាស់​ប្ដូរ​ចំណេះដឹង​

សុភាព​សិត​ចិន​ពោល​ថា​ «​បក្សី​គ្មាន​រោម​ មនុស្ស​គ្មាន​មិត្ត​ ​មិន​អាច​ឡើង​​​ដល់​លើ​ទី​ខ្ពស់​​» ​ ​ការ​ធំធាត់​នៅ​ក្នុង​ពិភពលោក​គ្មាន​ព្រំដែន​​​ដែល​ចំណេះដឹង​មាន​ច្រើន​មហាសាល​រហូត​ដល់​អ្នក​មិន​អាច​រៀន​ចេះ​អស់​ យើង​នឹង​បាន​រៀន​អ្វី​ថ្មី​ៗ​ តាម​រូប​បែប​ថ្មី​ណា​មួយ​ដូច​ជា​ Community of Practice ឬ​ការ​កសាងទំនាក់ទំនង​ដើម្បី​រៀនសូត្រ​លក្ខណៈ​សហគមន៍​ដើម្បី​ផ្លាស់ប្ដូរ​បទ​ពិសោធ​ ចំណេះដឹង​ រវាង​គ្នា​និង​គ្នា​ រឿង​អ្វី​ដែល​អ្នក​ពូកែ​ចូរ​ចែក​រំលែក​ អ្វី​ដែល​ជា​ចំណុច​ខ្សោយ​ចូរ​រៀន​សូត្រ​ កុំ​កំណាញ់​ចំណេះដឹង​ ព្រោះ​ចំណេះ​ដឹង​អ្នក​កាន់​តែ​ចែក​រំលែក​អ្នក​នឹង​កាន់​តែ​ពូកែ​ កុំ​ខ្មាស់​ដែល​អ្នក​មិន​ចេះ​ ឬ​ហើយ​ត្រូវ​ហ៊ាន​រៀន​សូត្របន្ថែម​អ្វី​ដែល​មិន​ចេះ​ ព្រោះ​នេះ​គឺ​ជា​វិធី​ធ្វើ​ឱ្យ​អ្នក​ឆ្ពោះ​ទៅ​កាន់​ភាព​ជា​មនុស្ស​ពូកែ​៕

ព័ត៌មានផ្សេងៗទៀត

ព័ត៌មានសំខាន់ៗ

បន្ទាប់ពីចិន មានតែកម្ពុជាទេដែលប្រើឱសថបុរាណចិនព្យាបាលកូវីដ-១៩?

ឱសថបុរាណចិន Lianhua Qingwen ត្រូវបានក្រសួងសុខាភិបាលកម្ពុជាបើកភ្លើងខៀវឱ្យចរាចរលើទីផ្សារកាលពីខែមេសាកន្លង។ ឱសថបុរាណនេះ ក៏ត្រូវបានក្រសួងសុខាភិបាលប្រើប្រាស់ជាផ្នែកមួយនៃមធ្យោបាយព្យាបាលអ្នកជំងឺកូវីដ-១៩ដែរ។ តើបន្ទាប់ពីចិន មានតែកម្ពុជាទេដែលប្រើឱសថបុរាណ Lianhua Qingwen នេះ? បើតាមលោកជំទាវ ឱ

ទទួលយកព័ត៌មានថ្មីៗ

បំពេញអ៊ីមែលរបស់លោកអ្នកដើម្បីទទួលយកព័ត៌មានថ្មីៗពី សសយក

ព័ត៌មានអំពី COVID-19

ព័ត៌មានពេញនិយម

បេសកកម្ម

មាន​គោល​បំណង​ដើម្បី​ជួយ​បណ្តុះ​បណ្តាល​យុវជន​កម្ពុជា​ឱ្យ​ក្លាយ​ទៅ​ជា​សសរ​ទ្រូង និង​ជា​ឆ្អឹង​ខ្នង​នៃ​ប្រទេស​ជាតិ

ចក្ខុវិស័យ

មាន​គោល​បំណង​ដើម្បីជួយ​បណ្តុះ​បណ្តាល​យុវជន​កម្ពុជា​ឱ្យ​ក្លាយ​ទៅ​ជា​សសរ​ទ្រូង និង​ជាឆ្អឹង​ខ្ន​ង​នៃ​ប្រទេស​ជាតិ

អំពីយើង

ស.ស.យ.ក រណសិរ្ស​ទូលំ​ទូលាយ​របស់​យុវជន​កម្ពុជា​ដែល​បន្ត​សកម្មភាព​ពី​សមាគម​យុវជន​កម្ពុជា និង​សមាគម​យុវជន​សាមគ្គី​សង្គ្រោះ​ជាតិ​កម្ពុជា​

scroll to top